ਬਿਹਾਰ ਦੇ ਸਮਸਤੀਪੁਰ ਜ਼ਿਲੇ ਤੋਂ ਇੱਕ ਦੁਖਦਾਈ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਛੱਠ ਪੂਜਾ ਦਾ ਪ੍ਰਸ਼ਾਦ ਜੂਠਾ ਕਰਨ 'ਤੇ ਗੁੱਸੇ ਵਿੱਚ ਆਈ ਇੱਕ ਮਾਂ ਨੇ ਆਪਣੀ ਚਾਰ ਸਾਲਾ ਧੀ ਨੂੰ ਕਥਿਤ ਤੌਰ 'ਤੇ ਬੁਰੀ ਤਰ੍ਹਾਂ ਕੁੱਟਿਆ, ਜਿਸ ਕਾਰਨ ਬੱਚੀ ਦੀ ਮੌਤ ਹੋ ਗਈ। ਘਟਨਾ ਪੂਸਾ ਥਾਣਾ ਖੇਤਰ ਦੇ ਪਿੰਡ ਮੁਹੰਮਦਪੁਰ ਬਿਰੌਲੀ ਦੇ ਵਾਰਡ ਨੰਬਰ 12 ਵਿੱਚ ਵਾਪਰੀ। ਪੁਲਿਸ ਨੇ ਦੋਸ਼ੀ ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਅਤੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।

ਪੁਲਿਸ ਮੁਤਾਬਕ ਰਾਜੂ ਪਾਸਵਾਨ ਦੀ ਪਤਨੀ ਰੀਨਾ ਕੁਮਾਰੀ ਛੱਠ ਪੂਜਾ ਲਈ ਭੋਜਨ ਅਤੇ ਪ੍ਰਸ਼ਾਦ ਤਿਆਰ ਕਰ ਰਹੀ ਸੀ। ਇਸ ਦੌਰਾਨ ਉਸ ਦੀ ਚਾਰ ਸਾਲਾ ਧੀ ਸੁਹਾਨੀ ਕੁਮਾਰੀ ਪ੍ਰਸ਼ਾਦ ਖਾਣ ਲਈ ਜ਼ਿੱਦ ਕਰਨ ਲੱਗੀ। ਮਾਂ ਨੇ ਉਸ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਪਰ ਕੁੜੀ ਨੇ ਪ੍ਰਸ਼ਾਦ ਚੁੱਕ ਕੇ ਜੂਠਾ ਕਰ ਦਿੱਤਾ। ਇਸ ਗੱਲ 'ਤੇ ਗੁੱਸੇ ਵਿੱਚ ਆਈ ਰੀਨਾ ਕੁਮਾਰੀ ਨੇ ਆਪਣੀ ਧੀ ਨੂੰ ਕੁੱਟਿਆ, ਜਿਸ ਨਾਲ ਬੱਚੀ ਗੰਭੀਰ ਜ਼ਖਮੀ ਹੋ ਗਈ।

ਬੱਚੀ ਨੂੰ ਤੁਰੰਤ ਇੱਕ ਨਿੱਜੀ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ, ਜਿੱਥੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ। ਮ੍ਰਿਤਕ ਬੱਚੀ ਦੇ ਪਿਤਾ ਰਾਜੂ ਪਾਸਵਾਨ ਅਨੁਸਾਰ ਪਰਿਵਾਰ ਦੇ ਹੋਰ ਮੈਂਬਰ ਛੱਠ ਪੂਜਾ ਲਈ ਘਾਟ ਬਣਾਉਣ ਗਏ ਹੋਏ ਸਨ ਅਤੇ ਇਹ ਘਟਨਾ ਘਰ ਵਿੱਚ ਵਾਪਰੀ। ਪਰਿਵਾਰ ਦੇ ਤਿੰਨ ਬੱਚੇ ਹਨ—ਸੱਤ ਸਾਲਾ ਸ਼ਿਵਾਨੀ ਕੁਮਾਰੀ, ਚਾਰ ਸਾਲਾ ਸੁਹਾਨੀ ਕੁਮਾਰੀ ਅਤੇ ਡੇਢ ਸਾਲਾ ਪੁੱਤਰ ਰਾਜਾ ਕੁਮਾਰ।

ਪਿੰਡ ਵਾਸੀਆਂ ਨੇ ਘਟਨਾ ਦੀ ਸੂਚਨਾ ਪੁਲਿਸ ਨੂੰ ਦਿੱਤੀ, ਜਿਸ ਤੋਂ ਬਾਅਦ ਪੂਸਾ ਥਾਣਾ ਪੁਲਿਸ ਮੌਕੇ 'ਤੇ ਪਹੁੰਚੀ ਅਤੇ ਦੋਸ਼ੀ ਮਾਂ ਰੀਨਾ ਕੁਮਾਰੀ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਪੁਲਿਸ ਨੇ ਲੜਕੀ ਦੀ ਲਾਸ਼ ਨੂੰ ਕਬਜ਼ੇ ਵਿੱਚ ਲੈ ਕੇ ਪੋਸਟਮਾਰਟਮ ਲਈ ਸਮਸਤੀਪੁਰ ਦੇ ਸਦਰ ਹਸਪਤਾਲ ਭੇਜ ਦਿੱਤਾ ਹੈ। ਪੂਸਾ ਪੁਲਿਸ ਸਟੇਸ਼ਨ ਦੇ ਇੰਚਾਰਜ ਰਾਕੇਸ਼ ਕੁਮਾਰ ਨੇ ਦੱਸਿਆ ਕਿ ਦੋਸ਼ੀ ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ ਅਤੇ ਮਾਮਲੇ ਵਿੱਚ ਅਗਲੇਰੀ ਕਾਨੂੰਨੀ ਕਾਰਵਾਈ ਕੀਤੀ ਜਾ ਰਹੀ ਹੈ। ਆਪਣੀ ਧੀ ਦੀ ਮੌਤ ਤੋਂ ਬਾਅਦ ਪਿਤਾ ਰਾਜੂ ਪਾਸਵਾਨ ਨੇ ਆਪਣੀ ਪਤਨੀ ਵਿਰੁੱਧ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ।